ਬੁਲੇਟ ਟਰੇਨ ਪ੍ਰਾਜੈਕਟ ਦਾ ਰੱਖਿਆ ਨੀਂਹ ਪੱਥਰ,  ਮੋਦੀ ਤੇ ਆਬੇ ਨੇ ਪ੍ਰਾਜੈਕਟ ਦਾ ਕੀਤਾ ਉਦਘਾਟਨ

 ਬੁਲੇਟ ਟਰੇਨ ਪ੍ਰਾਜੈਕਟ ਦਾ ਰੱਖਿਆ ਨੀਂਹ ਪੱਥਰ,  ਮੋਦੀ ਤੇ ਆਬੇ ਨੇ ਪ੍ਰਾਜੈਕਟ ਦਾ ਕੀਤਾ ਉਦਘਾਟਨ

ਅਹਿਮਦਾਬਾਦ— 14 ਸਤੰਬਰ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਜਾਪਾਨ ਦੇ ਪ੍ਰਧਾਨ ਮੰਤਰੀ ਸ਼ਿੰਜੋ ਆਬੇ ਨੇ ਅਹਿਮਦਾਬਾਦ 'ਚ ਬੁਲੇਟ ਟਰੇਨ ਪ੍ਰਾਜੈਕਟ ਦਾ ਨੀਂਹ ਪੱਥਰ ਰੱਖ ਦਿੱਤਾ ਹੈ। ਭਾਰਤ 'ਚ ਇਹ ਪ੍ਰਾਜੈਕਟ ਜਾਪਾਨ ਦੀ ਮਦਦ ਨਾਲ ਸ਼ੁਰੂ ਹੋ ਰਿਹਾ ਹੈ। ਜਾਪਾਨ ਇਸ ਪ੍ਰਾਜੈਕਟ ਨੂੰ ਪੂਰਾ ਕਰਨ ਲਈ ਭਾਰਤ ਨੂੰ 88 ਹਜ਼ਾਰ ਕਰੋੜ ਰੁਪਏ ਦਾ ਸਾਫਟ ਲੋਨ ਦੇਵੇਗਾ, ਜਿਹੜਾ 50 ਸਾਲਾਂ ਤਕ ਲਈ ਹੋਵੇਗਾ। ਇਹ ਟਰੇਨ ਅਹਿਮਦਾਬਾਦ ਅਤੇ ਮੁੰਬਈ ਵਿਚਕਾਰ 508 ਕਿਲੋਮੀਟਰ ਦੀ ਦੂਰੀ ਤੈਅ ਕਰੇਗੀ। ਇਸ ਤੋਂ ਬਾਅਦ ਬੁਲੇਟ ਟਰੇਨ ਹੋਰ ਸ਼ਹਿਰਾਂ 'ਚ ਵੀ ਚਲਾਉਣ ਦੀ ਤਿਆਰੀ ਸ਼ੁਰੂ ਕੀਤੀ ਜਾਵੇਗੀ।

2 ਘੰਟੇ 40 ਮਿੰਟ 'ਚ ਪੂਰਾ ਹੋਵੇਗਾ ਸਫਰ
ਬੁਲੇਟ ਟਰੇਨ 'ਚ ਇਕੋ ਵੇਲੇ 750 ਲੋਕ ਇੱਕਠੇ ਯਾਤਰਾ ਕਰ ਸਕਣਗੇ ਅਤੇ ਹਰ ਦਿਨ 36,000 ਲੋਕ ਇਸ 'ਚ ਆਪਣੀ ਯਾਤਰਾ ਪੂਰੀ ਕਰ ਸਕਣਗੇ। ਇਹ ਟਰੇਨ ਸਾਬਰਮਤੀ ਰੇਲਵੇ ਸਟੇਸ਼ਨ ਤੋਂ ਬਾਂਦ੍ਰਾ ਕੁਰਲਾ ਕੰਪਲੈਕਸ ਮੁੰਬਈ ਵਿਚਕਾਰ 508 ਕਿਮੀ. ਦੀ ਦੂਰੀ ਤੈਅ ਕਰੇਗੀ। ਇਸ ਦੌਰਾਨ ਇਹ 4 ਸਟੇਸ਼ਨਾਂ 'ਤੇ ਰੁਕਦੇ ਹੋਏ 2 ਘੰਟੇ 7 ਮਿੰਟ 'ਚ ਸਾਰਾ ਸਫਰ ਪੂਰਾ ਕਰ ਲਵੇਗੀ। ਇਸ ਤੋਂ ਇਲਾਵਾ 12 ਸਟੇਸ਼ਨ ਪ੍ਰਸਤਾਵਿਤ ਕੀਤੇ ਗਏ ਹਨ। ਇਨ੍ਹਾਂ ਸਾਰੇ 12 ਸਟੇਸ਼ਨਾਂ 'ਤੇ ਰੁਕਣ 'ਤੇ ਵੀ ਪੂਰੀ ਦੂਰੀ 2 ਘੰਟੇ 58 'ਚ ਕਵਰ ਹੋ ਜਾਵੇਗੀ। ਰੇਲ ਮੰਤਰੀ ਦਾ ਕਹਿਣਾ ਹੈ ਕਿ ਹੋਰ ਮਾਰਗਾਂ 'ਤੇ ਬੁਲੇਟ ਟਰੇਨ ਚਲਾਉਣ ਲਈ ਅਹਿਮਦਾਬਾਦ-ਮੁੰਬਈ ਮਾਰਗ 'ਤੇ ਕੰਮ ਪੂਰਾ ਹੋਣ ਦੀ ਉਡੀਕ ਨਹੀਂ ਕੀਤੀ ਜਾਵੇਗੀ ਸਗੋਂ ਪਹਿਲਾਂ ਹੀ ਕੰਮ ਸ਼ੁਰੂ ਕਰ ਦਿੱਤਾ ਜਾਵੇਗਾ। ਹੋਰ ਮਾਰਗਾਂ 'ਚ ਦਿੱਲੀ-ਕੋਲਕਾਤਾ, ਦਿੱਲੀ-ਮੁੰਬਈ, ਦਿੱਲੀ-ਚੰਡੀਗੜ੍ਹ, ਮੁੰਬਈ-ਨਾਗਪੁਰ ਅਤੇ ਦਿੱਲੀ-ਨਾਗਪੁਰ ਹਨ।